So mancher hat in letzten Taachen
schon iwwers Wetter mächt’ch jetobt.
Da kann ich blos das eene saachen,
was jeder Hallenser mir gloobt:
Äs Wetter war in diesen Falle
schon richt’ch, denn: Jahrmarcht is in Halle!
Nu währn de Fitzen lanksam trocken,
d’r Matsch kläbt zwar an Schuh’n wie Kitt,
doch nu laß’ch mich schon ehr forlocken
un mach’e Jahrmarchtsbummel mit.
Von weiten hart mer schon Musike
un ä Jekrehle un Jequieke! Jlei forn bein Leckerhoni-Fritzen, sejar bein Eismann schtehnse an, währnd andre in’ner Bude sitzen
un sahn de „Illußjon“ sich an.
An ä HO-Schtand, schtols wie Färschten,
erfrein sich Hungriche an Wärschten.
Jedoch enne besondre Freide,
die bring‘ de Karreseils mit sich,
da lassen sich de junken Leite
dorch’nander schlenkern, färchterlich!
De Kleen‘ fahrn liewer Feierwehre,
da bimmeln se un bäben sehre. Sejar Motorrad kammer fahrn lern‘.
An Autoschkooter is was los!
Ooch in Ärrjarten kannste rumärrn.
Wer Jlick in Schbiel hat, nimmt ä Los.
Da jibbts ä Wecker ze jewinn‘
oder ä Korb mit Eiern drin! Forr ener Bude schtehn de Leite, da belln de Quiene wie forrickt. So hat ähmd jeder seine Freide.
Am meesten sin de Kleen‘ bejlickt.
Un uff n Heemwech denken alle:
D’r Jahrmarcht is ä Schtickchen Halle.
ünter Krause 1.4.1952
